Pune Gang War Case: पुण्यात आयुष कोमकर हत्या प्रकरणात आता नवी माहिती समोर आली आहे. आता वनराज आंदेकरची पत्नी सोनाली आंदेकर ही पोलिसांच्या रडारवर आहे.
अभिजित दराडे, पुणे:आयुष कोमकर हत्या प्रकरणात आत्तापर्यंत पोलिसांनी 13 आरोपींना ताब्यात घेतल आहे. यात मुख्य आरोपी असणारा कृष्णा आंदेकर हा समर्थ पोलिसांत स्वतःहून हजर झाला होता. माजी नगरसेवक वनराज आंदेकर याच्या खुनाचा बदला घेण्यासाठी वनराजच्या खुनातील प्रमुख आरोपी गणेश कोमकर याचा मुलगा आयुष उर्फ गोविंदा कोमकर याचा खून आंदेकर टोळीने 5 सप्टेंबरच्या रात्री केला होता. त्यानंतर पोलिसांनी आंदेकर टोळीच्या मुसक्या आवळत 13 जणांवर कारवाई केली आहे.
आता या प्रकरणात आणखी एका आंदेकरवर पोलिसांची नजर आहे. ती व्यक्ती म्हणजे वनराज आंदेकर याची पत्नी सोनाली आंदेकर. सोनाली आंदेकर यांचा देखील आयुष कोमकर हत्या प्रकरणात सहभाग असल्याचा संशय पुणे पोलिसांना आहे. त्यासाठी पुणे पोलीस हे सोनाली आंदेकर हिच्या मागावर आहेत. विविध पथके नेमून पोलीस फरार सोनाली आंदेकर हिचा शोध घेत आहेत. त्यामुळे या प्रकरणात आणखी एका आंदेकरला अटक होऊ शकते अशी माहिती आता समोर आली आहे. Pune Gang War: अर्णव रडत होता, आयुष निपचित पडलेला; त्यादिवशी बेसमेंटमध्ये नेमकं काय घडलं? कोमकर हत्याकांडाची नवी माहितीया हत्या प्रकरणात पोलिसांनी बंडूअण्णा राणोजी आंदेकर (वय ६४), तुषार वाडेकर (वय २४), स्वराज वाडेकर ( वय २१), वृंदावनी वाडेकर (वय ४०), तसेच अमन युसूफ पठाण उर्फ खान (वय २२, सर्व रा. नाना पेठ), सुजल मेरगू (वय २३) यांना यांना बुलढाणा परिसरातून अटक केली होती तर अमित पाटोळे (वय १९), यश पाटील (वय १९) या दोघांना पोलिसांनी हत्येच्या दुसऱ्या दिवशी ताब्यात घेतलं होतं. यामध्ये प्रमुख आरोपी असणारा कृष्णा आंदेकर हा स्वतःहून पोलिसांत हजर झाला होता. त्यामुळे आता आंदेकर टोळीला पुरतं संपवण्यासाठी पुणे पोलिसांनी कंबर कसली आहे. या हत्या प्रकरणात ज्यांच्या ज्यांच्या संशय आहे अशा सर्वांना पोलिसांनी ताब्यात घ्यायला सुरुवात केली आहे. यामध्ये आता आयुष कोमकर याची मामी आणि वनराजची पत्नी सोनाली आंदेकर सुद्धा पोलिसांच्या रडावर आहे. तिला ताब्यात घेतल्यानंतर आणखी काय खुलासा या प्रकरणात होतो हे पाहणे महत्वाचे आहे.
