धाराशिवमध्ये एक दुखद घटना समोर आली आहे. एका महिलेचं पतीसोबत जमलं नाही. तिच्या घटस्फोटाचा खटला हा न्यायप्रविष्ठ होता, असं असताना एका तरुणाने तिला प्रेमाच्या जाळ्यात ओढलं. पण तरुणाच्या छळाला कंटाळून महिलेने टोकाचं पाऊल उचलल्याचा आरोप करण्यात येतोय.
रहीम शेख, धाराशिव : प्रेमाची ठराविक अशी व्याख्या नाही. ते कोणावर होईल हे सांगता येत नाही. पण प्रेम हे निस्वार्थी असतं. ती एक निर्मळ भावना असते. स्वार्थ आला की माणसं कुठल्याही स्तराला जातात. कुठलाही विचार करत नाही. कळंब शहरात एक अघटीत घटना घडली आहे. एका 30 वर्षे महिलेला प्रेमाच्या जाळ्यात ओढलं आणि तिला सतत पैशांची मागणी होऊ लागली. या मानसिक त्रासाला कंटाळून 30 वर्षे महिलेने विषारी औषध घेऊन स्वतःचे जीवन संपवलं आहे.
मयत महिलेचं पती सोबत जमत नसल्यामुळे कोर्टात वाद सुरू होता. त्यांचा घटस्फोट होत नव्हता. हे प्रकरण न्यायप्रविष्ठ असल्यामुळे मयत महिलाही आईकडे म्हणजेच कळंब शहरात राहत होती. घराशेजारी राहत असलेल्या एका विवाहित तरुणाबरोबर तिची ओळख झाली. ओळखीचे रूपांतर प्रेमात झाले. जेव्हा मयत महिला लग्नासाठी त्या मुलाकडे सतत विचारणा करू लागली तेव्हा आरोपी या महिलेकडे पगाराची मागणी करू लागला. सततच्या पैशांच्या मागणीला कंटाळून आणि मानसिक त्रासाला कंटाळून महिलेने विषारी औषध घेऊन स्वतःला संपवलं आणि पोटच्या लेकराला अनाथ करत जग सोडलं. मृतक 30 वर्षीय महिलेचं नाव मनिषा शिंदे असं आहे. ती कळंब तालुक्यातील रहिवासी होती. महिलेने 7 सप्टेंबरला सायंकाळी सहा वाजेच्या सुमारास आपल्या राहत्या घरी विषारी औषध घेऊन स्वत:ला संपवून घेतलं. या घटनेमुळे परिसरात एकच खळबळ उडाली. या घटनेनंतर 49 वर्षीय संजय पवार यांनी कळंब पोलीस ठाण्यात फिर्याद दिली.
आरोपी फरार, शोध सुरु
कळंब एसटी आगारामध्ये क्लर्क असलेल्या आरोपी राहुल राजेंद्र शिंदे याच्या त्रासाला कंटाळून मनीषाने आत्महत्या केली, अशी फिर्याद पोलीस ठाण्यात देण्यात आली. आरोपी राहुल हा कळंब तालुक्यातील येरमाळा इथला रहिवासी आहे. त्याने मनीषाला प्रेमाच्या जाळ्यात ओढलं. तिच्या असाहयतेचा फायदा घेऊन तुझ्या पगारीचे पैसे मला दे तेव्हाच तुझ्यासोबत लग्न करतो, असं म्हणत सतत मानसिक त्रास दिला. या मानसिक त्रासाला कंटाळून मनीषा शिंदे या महिलेने विषारी औषध घेऊन आत्महत्या केली, असा आरोप पोलीस ठाण्यात करण्यात आलेल्या फिर्यादीत म्हटलं आहे.
या प्रकरणी पोलिसांकडून भारतीय न्याय संहिता कलम 108 अन्वये कळंब पोलीस ठाण्यात गुन्हा दाखल करण्यात आला आहे. आरोपी राहुल शिंदे हा फरार आहे. पोलीस त्याचा शोध घेत आहेत. या प्रकरणाचा तपास पोलीस निरीक्षक अजित चितळे यांच्या मार्गदर्शनाखाली सहाय्यक पोलीस निरीक्षक प्रभा पुंडगे हे करत आहेत.
