Baaghi 4 vs The Bengal Files Box Office Collection: 5 सप्टेंबर रोजी रीलिज झालेल्या ‘बागी 4’ आणि ‘द बंगाल फाइल्स’ या चित्रपटांनी 5 दिवसात किती कमाई केली?
मुंबई: बॉलिवूड सिनेरसिकांचे मनोरंजन करण्यासाठी या शुक्रवारी ‘बागी 4’ आणि ‘द बंगाल फाइल्स’ असे दोन चित्रपट रीलिज झाले. एका सिनेमात अॅक्शन थ्रिलर आहे, तर दुसरा ‘पॉलिटिकल ड्रामा’ आहे. आणि राजकीय नाटक – या दोन्ही मोठ्या पडद्यावर प्रदर्शित होणाऱ्या चित्रपटांमध्ये विविधता होती. दोन्ही सिनेमांची बॉलिवूड रसिकांमध्ये चर्चा झालेली, मात्र बॉक्स ऑफिसबद्दल बोलायचे झाल्यास Baaghi 4 ने The Bengal Files ला पछाडले आहे. ‘बागी’ फ्रँचायझीच्या चौथ्या भागाने शुक्रवारी बॉक्स ऑफिसवर चांगली सुरुवात केली. रीलिजनंतरच्या पहिल्या सोमवारी आणि मंगळवारी मोठी घसरण झाली असली तरी या सिनेमाने देशभरात 38 कोटींहून अधिक कमाई केली आहे.
‘बागी 4’ विरुद्ध ‘द बंगाल फाइल्स’
सॅकनिल्कने दिलेल्या रिपोर्टनुसार, ‘बागी 4’सिनेमाने पहिल्या सोमवारी (8 सप्टेंबर 2025) 4.50 कोटी रुपयांची कमाई केली. तर पाचव्या दिवसाच्या सुरुवातीला 2.99 कोटींची कमाई केल्याचा अंदाज आहे. या सिनेमाने शुक्रवारी 12 कोटी रुपयांची कमाई करत चांगली सुरुवात केली होती. पहिल्या सोमवारी झालेली घसरण अपेक्षितच होती. एकूण 5 दिवसात या सिनेमाने 38.74 कोटींची कमाई केली आहे. मंगळवारी झालेल्या कमाईचे सविस्तर आकडे समोर आल्यानंतर या आकडेवारीत आणखी बदल होऊ शकतो.’बागी 4’सोबतच5 सप्टेंबर रोजी प्रदर्शित झालेल्या ‘द बंगाल फाइल्स’कडे मात्र प्रेक्षकांनी पाठ फिरवल्याचे चित्र आहे. टायगर श्रॉफचा हा सिनेमा रीलिजनंतर अवघ्या 5 दिवसात 40 कोटी रुपयांच्या कमाईकडे वाटचाल करत असताना, ‘द बंगाल फाइल्स’ने अद्याप दुहेरी आकडाही गाठलेला नाही.
विवेक अग्निहोत्रींच्या या सिनेमाने पहिल्या दिवशी 1.75 कोटी रुपये कमावले होते. त्यानंतर आठवड्याच्या शेवटी यात थोडीफार वाढ झाली होती, मात्र सोमवारी पुन्हा एकदा कमाई घटली. रीलिजनंतर पहिल्या सोमवारी ‘द बंगाल फाइल्स’ने अवघे 1.15 कोटी रुपये कमावले आहेत. तर पाचव्या दिवसाची सुरुवातीची आकडेवारी समोर आली आहे त्यानुसार, मंगळवारी 1.16 कोटी रुपयांची कमाई झाली आहे. एकूण 5 दिवसात या सिनेमाने 09.06 कोटी रुपये कमावले आहेत.
