दिल्लीतील एका खासगी व्यवस्थापन महाविद्यालयात १७ विद्यार्थिनींच्या लैंगिक छळाचा आरोप स्वामी चैतन्यानंद सरस्वतीवर आहे. तो रात्री उशिरा विद्यार्थिनींना खोलीत बोलावून विचित्र मेसेज पाठवायचा, तसेच होळीच्या दिवशीही त्याने जबरदस्तीने स्पर्श केला.
नवी दिल्ली: दिल्लीतील एका खासगी व्यवस्थापन महाविद्यालयात शिकणाऱ्या विद्यार्थिनींच्या लैंगिक शोषण प्रकरणात दररोज नवी माहिती समोर येत आहे. स्वामी चैतन्यानंद सरस्वती ऊर्फ पार्थ सारथीवर १७ विद्यार्थिनींच्या शारीरिक आणि मानसिक छळाचे आरोप आहेत. तो अद्याप फरार असून त्याचं अखेरचं लोकेशन मुंबईत सापडलं आहे. पोलिसांची पथकं त्याच्या अटकेसाठी धाडी टाकत आहेत. पार्थ सारथीनं देश सोडून जाऊ नये यासाठी लूक आऊट नोटिस जारी करण्यात आलेली आहे.
एफआयआरमध्ये विद्यार्थिनींनी दिलेले जबाब महत्त्वाचे आहेत. ६२ वर्षीय स्वामी चैतन्यानंद रात्री उशिरा विद्यार्थिनींना त्याच्या खोलीत बोलवायचा, तो तरुणींना विचित्र मेसेज करायचा. ‘बेबी, आय लव्ह यू, आय अडोर यू’, ‘आज तू खूप सुंदर दिसतेस, ये ना जवळ’, असे मेसेज मध्यरात्रीच्या सुमारास पार्थ सारखी करायचा. विद्यार्थिनींनी प्रतिसाद न दिल्यास पार्थ सारथी त्या तरुणींवर प्राध्यापकांच्या माध्यमातून दबाव आणायचा. मेसेजला उत्तर न दिल्यास परीक्षेत मार्क्स कापण्याची धमकी दिली जायची. एका विद्यार्थिनीच्या पायाच्या बोटाला फ्रॅक्चर झालं होतं. तिनं याबद्दलचा एक्स रे स्वामी चैतन्यानंद यांना पाठवला. तेव्हापासून तिला स्वामी चैतन्यानंदकडून ‘आज खून छान दिसत आहेस,’ अशा स्वरुपाचे मेसेज येऊ लागले. पीडित तरुणीनं पोलिसांकडे जबाब नोंदवला आहे. पोलिसांच्या एका एफआयआरमध्ये एका खास घटनेचा उल्लेख आहे. होळीच्या दिवशी स्वामी चैतन्यानंदनं विद्यार्थिनींना रांगेत उभं केलं आणि त्यांना हरि ओम बोलण्यास सांगितलं. त्यानंतर त्यानं विद्यार्थिनींना स्वत:समोर वाकण्यास सांगितलं. त्यानंतर त्यांच्या कपाळावर आणि गालावर रंग लावला. यावेळी त्यानं जबरदस्तीनं स्पर्श केला आणि सतत बेबी बेबी म्हटल्याचा आरोप एका विद्यार्थिनीनं केला आहे.
तपासकर्त्यांनी दिलेल्या माहितीनुसार, स्वामी चैतन्यानंदचा संस्थेत आणि वसतिगृहात प्रचंड दबदबा होता. तो विद्यार्थिनींच्या प्रत्येक हालचालींवर लक्ष ठेवायचा. वसतिगृहाच्या लॉबीपासून शौचालयाच्या बाहेरपर्यंत असलेल्या सगळ्या सीसीटीव्ही कॅमेऱ्यांमधील लाईव्ह फुटेज तो त्याच्या मोबाईलवर पाहायचा. आर्थिक दृष्ट्या मागास असलेल्या ७५ विद्यार्थिनी वसतिगृहात आहेत. स्वामी चैतन्यानंद त्यांच्या प्रत्येक हालचालीवर बारीक लक्ष ठेवायचा, याची त्यांना पुसटशीही कल्पना नव्हती.
