शिवसेनेचा नेता रहस्यमयरित्या बेपत्ता, विधानसभेत शिंदेंनी दिली होती मोठी जबाबदारी, राजकारणात खळबळ!

Published by:

Last Updated:September 05, 2025 11:18 AM IST
विधानसभा निवडणुकीत एकनाथ शिंदे यांनी ज्यांच्यावर महत्त्वाची जबाबदारी दिली होती, ते शिंदे गटाचे नेते रहस्यमयरित्या बेपत्ता झाले आहेत.

News18

विजय वाघमारे, प्रतिनिधी जळगाव: राज्याच्या राजकीय वर्तुळात खळबळ उडवून देणारी घटना समोर आली आहे. विधानसभा निवडणुकीत एकनाथ शिंदे यांनी ज्यांच्यावर महत्त्वाची जबाबदारी दिली होती, ते शिंदे गटाचे नेते रहस्यमयरित्या बेपत्ता झाले आहेत. जळगाव शहरातील एका बँकेच्या एटीएममधून ते पैसे काढताना आढळून आले होते. त्यानंतर ते अचानक बेपत्ता झालेत. ते कुठे गेलेत? त्यांच्यासोबत नक्की काय घडलं? याचा कुणाला काहीच थांगपत्ता नाही. त्यांचे दोन्ही मोबाईल बंद असल्याने आणखी सस्पेन्स निर्माण झाला आहे. या प्रकरणी पोलीस ठाण्यात फिर्याद दाखल करण्यात आली आहे.

संजय लोटन पाटील असं बेपत्ता झालेल्या शिवसेना शिंदे गटाच्या नेत्याचं नाव आहे. ते जळगाव ग्रामीणचे विधानसभा क्षेत्रप्रमुख आहेत. संजय पाटील अशाप्रकारे रहस्यमयरीत्या बेपत्ता झाल्याने राजकीय वर्तुळात खळबळ उडाली आहे. पाटील हे पालकमंत्री गुलाबराव पाटील यांचे निकटवर्तीय मानले जातात. कुटुंबियांनी दिलेल्या तक्रारीनंतर जळगाव शहर पोलीस ठाण्यात त्यांचा शोध सुरू झाला आहे.

advertisement

नेमके काय घडले?
संजय पाटील हे मूळचे धरणगाव तालुक्यातील दोनगावचे रहिवासी आहेत. मात्र सध्या ते धुळे येथे वास्तव्याला होते. काही दिवसांपूर्वी ते धुळ्याहून गावाकडे जात असल्याचे सांगून घरातून निघाले. त्यानंतर त्यांच्याशी कोणताही संपर्क होऊ शकलेला नाही. त्यांचे दोन्ही मोबाईल फोन बंद आहेत.
पोलिसांनी केलेल्या तपासात आणि सीसीटीव्ही फुटेजमध्ये ते जळगाव शहरातील एका बँकेतून पैसे काढताना आढळले आहेत. त्यानंतर ते कोर्ट चौकाकडे जाताना दिसून आले. शेवटच्या माहितीनुसार, ते जळगाव रेल्वे स्थानकावर अयोध्येला जाणाऱ्या रेल्वेत बसल्याचे समजले आहे. पाटील कुटुंबीयांनी तातडीने जळगाव शहर पोलीस ठाण्यात तक्रार दाखल केली आहे. पोलीस या प्रकरणाचा सखोल तपास करत असून, त्यांच्या अचानक बेपत्ता होण्यामागचे कारण शोधण्याचा प्रयत्न करत आहेत.
मराठी बातम्या/महाराष्ट्र/
शिवसेनेचा नेता रहस्यमयरित्या बेपत्ता, विधानसभेत शिंदेंनी दिली होती मोठी जबाबदारी, राजकारणात खळबळ!