Authored by: प्रमोद सरवळे•Reported by: Harsh Dudhe|महाराष्ट्र टाइम्स.कॉम•9 Sept 2025, 9:14 am
Maharashtra engineering admission 2025: महाराष्ट्र राज्यातील इंजिनीअरिंग कॉलेजांमधील प्रथम वर्ष प्रवेशाच्या चार नियमित फेऱ्या पूर्ण झाल्यानंतरही ६० हजारांहून अधिक जागा रिक्त आहेत. विद्यार्थ्यांचा कल अजूनही कम्प्युटर इंजिनीअरिंगकडे अधिक आहे, तर पारंपरिक शाखांमध्ये जागा मोठ्या प्रमाणात शिल्लक आहेत.आता संस्थात्मक कोट्यातील जागा भरण्यासाठी संस्थाचालकांचे प्रयत्न सुरू असून, एआय संबंधित शाखांमध्येही काही जागा रिक्त असल्याने आश्चर्य व्यक्त होत आहे.
First Year Engineering admission 2025-26 Maharashtra :’सीईटी सेल’कडून प्रथम वर्ष इंजिनीअरिंग प्रवेशासाठी राबविण्यात आलेल्या चार नियमित फेऱ्यांनंतर कॉलेजांमध्ये ६० हजार ७३३ जागा रिक्त राहिल्या आहेत. पहिल्या चार फेऱ्यांमध्ये विद्यार्थ्यांनी मुख्यतः कम्प्युटर इंजिनीअरिंग आणि संगणक संबंधित शाखांकडे प्राधान्य दिले आहे. सीईटी सेलकडून इंजिनीअरिंगच्या प्रथम वर्ष प्रवेशासाठी चार फेऱ्या राबविण्यात आल्या आहेत. प्रवेशासाठी राज्यभरातील कॉलेजांमध्ये उपलब्ध दोन लाख २ हजार ६३८ जागांपैकी सुमारे ३० टक्के म्हणजे ६०,७३३ जागा अद्याप भरलेल्या नाहीत.
कम्प्युटर इंजिनीअरिंगसाठी ३२ हजार १७१ जागांपैकी २२ हजार ९५५ जागा भरल्या गेल्या असून, नऊ हजार २१६ जागा रिक्त राहिल्या आहेत. त्याचप्रमाणे कम्प्युटर सायन्स अँड इंजिनीअरिंगमध्ये १५ हजार २६३ प्रवेश झाले, तर चार हजार ५९७ जागा रिक्त आहेत. पारंपरिक शाखांमध्ये मेकॅनिकल इंजिनीअरिंगमध्ये १५ हजार २३३ जागांवर प्रवेश झाला असला, तरी ८६२० जागा रिक्त आहेत. त्याचप्रमाणे सिव्हिल इंजिनिअरिंगमध्ये सहा हजार ५११ जागा रिक्त असून, त्याचे प्रमाण ३७.३१ टक्के आहे. या परिस्थितीत संस्थात्मक प्रवेश फेरीत संस्थेच्या कोट्यातील २० टक्के जागांसह कॅप फेरीतून रिक्त जागा भरल्या जातील का, याकडे संस्थाचालकांचे लक्ष लागले आहे. त्या दृष्टीने प्रयत्न करण्यात येत आहेत.IB Bharti 2025: ‘इंटेलिजेंस ब्युरो’मध्ये सुरक्षा सहाय्यकच्या ४५५ जागांसाठी मेगाभरती! जाणून घ्या निवड प्रक्रिया
विशेष म्हणजे, संस्थात्मक आणि एनआरआय कोट्यातून प्रवेश घेणाऱ्यांना तिप्पट आणि पाचपट शुल्क भरण्याची गरज असणार आहे. त्यासाठीची प्रवेश प्रक्रिया सुरू झाली आहे. विद्यार्थ्यांनी सीईटी सेलच्या वेबसाइटसह कॉलेजांच्या वेबसाइटवर लक्ष ठेवण्याचे आवाहन सीईटी सेलच्या प्रशासनाने केले आहे.
Success Story: आई कोर्टात टायपिस्ट, वडील दुकानदार; अजित पवारांचा फोन नाकारून ठाम राहिलेल्या IPS अंजना कृष्णांची यशोगाथा
एआयशी संबंधित जागाही रिक्त -सध्या कृत्रिम बुद्धीमत्ता (एआय) आणि मशिन लर्निंगचा (एमएल) सर्वत्र बोलबाला आहे. भविष्यातील अनेक क्षेत्रांमध्ये एआयचा वापर मोठ्या प्रमाणावर होणार आहे. त्यामुळे कुशल तंत्रज्ञानाची गरज भासणार आहे. असे असले तरी, एआय अँड डेटा सायन्स, एआय-एमएल आणि कम्युटर सायन्स अँड इंजिनिअरिंग (एआय-एमएल) या नव्या शाखांमध्येही २५ ते ३० टक्के जागा अद्याप भरलेल्या नाहीत. त्यामुळे आश्चर्य व्यक्त करण्यात येत आहे.
