Authored by: प्रमोद सरवळे•Reported by: हर्ष दुधे|महाराष्ट्र टाइम्स.कॉम•27 Sept 2025, 9:30 am
Indian Institutes of Management Pune: पुण्यात ‘इंडियन इन्स्टिट्यूट ऑफ मॅनेजमेंट’ (आयआयएम) ची स्वतंत्र शाखा सुरू करण्याऐवजी नागपूर आणि मुंबईच्या शाखांचा विस्तार होत आहे. या निर्णयामुळे राजकीय नेते आणि विद्यार्थी संघटना नाराज आहेत. पुणे शहराला दुय्यम वागणूक मिळत असल्याचा आरोप होत आहे. स्वतंत्र ‘आयआयएम’ ची स्थापना करण्याची मागणी जोर धरू लागली आहे. या मागणीमुळे पुण्यातील शिक्षण क्षेत्राला नविन दिशा मिळेल, असा विश्वास व्यक्त केला जात आहे.
IIM Pune updates :पुणे आणि पिंपरी-चिंचवड शहराची क्षमता पाहता ‘ स्वतंत्र इंडियन इन्स्टिट्यूट ऑफ मॅनेजमेंट पुणे ‘ (आयआयएम, पुणे) स्थापन करण्याऐवजी नागपूर आणि मुंबई येथील ‘आयआयएम’ शाखांचा विस्तार करण्यात येत आहे. या दोन्ही संस्थांना मिळणाऱ्या जागेत स्वतंत्र ‘आयआयएम पुणे’ची स्थापना करून, पुण्याला मिळणारी दुय्यम वागणूक थांबवावी, अशी आग्रही मागणी राजकीय नेते, अभ्यासक आणि विद्यार्थी संघटनांकडून होत आहे.
पुणे परिसरातील आयटी कंपन्या, वाहन उद्योग, उत्पादन कंपन्या, सेवा कंपन्यासाठी मनुष्यबळ तयार करण्यासाठी ‘आयआयएम’ सारख्या स्वतंत्र संस्थेची पुण्यात स्थापना व्हावी, ही मागणी अनेक वर्षांपासून आहे. गेली अकरा वर्षे राज्यात आणि केंद्रात भारतीय जनता पक्षाचे सरकार आहे. मात्र, ‘आयआयएम, पुणे’ स्थापन झाले नाही, ही वस्तुस्थिती आहे. अशातच ‘आयआयएम, नागपूर’ची शाखा स्थापन झाल्यानंतर, मोशी येथे विस्तारासाठी ७० एकर जागा देण्यात आली. त्यानंतर लगेच ‘आयआयएम, मुंबई’ची शाखा पुण्यात स्थापन होणार असल्याचे जाहीर करण्यात आले. मात्र, स्वतंत्र ‘आयआयएम, पुणे’ची स्थापन करण्याऐवजी केवळ दुसऱ्या शहरातील संस्थांच्या विस्तारीकरणावर महत्त्व देण्यात येत आहे.Success Story: बिजनौरच्या श्रुती शर्माची UPSC परीक्षेत बाजी! देशात पहिली रँक, जाणून घ्या तिच्या यशाचे गुपित
या शाखा विस्तारीकरणाऐवजी पुणे आणि पिंपरी-चिंचवड परिसरासाठी ‘आयआयएम, पुणे’ अशा स्वतंत्र संस्थेची स्थापना करण्याची मागणी जोर धरू लागली आहे. “आयआयएम’चे स्वतंत्र केंद्र होण्याऐवजी उपकेंद्र पुण्यात होणार, ही घोषणा निराशाजनक असून,भाजपचे सरकार पुण्याला नेहमी दुय्यम वागणूक का देत आहे,’ असा सवाल माजी आमदार मोहन जोशी यांनी उपस्थित केला आहे. ‘या दोन्ही संस्थांऐवजी ‘आयआयएम, पुणे’ची स्थापना करून पुण्याला न्याय द्यावा,’ अशी मागणी जोशी यांनी केली.
अभ्यासक, विद्यार्थ्यांची मागणी असतानाही ‘आयआयएम, पुणे’ मंजूर करण्यात आले नाही. यामुळे पुण्याचे शिक्षणातील महत्त्व कमी करण्याचा प्रयत्न होत आहे. स्टार्टअप इंडियाच्या धोरणात सहभागी होऊन उद्योग उभे करणाऱ्या तरुणांची संख्या पुण्यात लक्षणीय आहे. अशा वेळी पुण्याला वेगळे ‘आयआयएम’ न मिळणे हे आश्चर्यचकित करणारे आहे.- कल्पेश यादव, सहसचिव, युवासेना
महाराष्ट्रातील शिक्षकांसाठी मोठी बातमी! कामाचे ओझे झाले कमी; शाळांमधील विविध समितींची संख्या कमी करण्याचा निर्णय
पुण्याला ९९ या क्रमांकावर असलेल्या ‘आयआयएम, नागपूर’ किंवा सहाव्या क्रमांकावर असलेल्या ‘आयआयएम, मुंबई’ची आवश्यकता काय? पुण्यात सर्व प्रकारची कौशल्य असणारे तज्ज्ञ; तसेच अभियांत्रिकी व्यवस्थापन आणि संशोधन क्षेत्रांमध्ये मार्गदर्शन, प्रशिक्षण सुविधा उपलब्ध होऊ शकतात. या आधारावर मोशीतील जागेवरच स्वतंत्र आयआयएम पुणे होऊ शकते.- मुकुंद कीर्दत, आम आदमी पक्ष
पुणे हे हे शिक्षणाचे माहेरघर असल्याने, तेथे शाखा विस्तार किंवा उपकेंद्राऐवजी स्वतंत्र ‘आयआयएम, पुणे’ स्थापन होणे गरजेचे आहे. अशा वेळी ‘आयआयएम, पुणे’ची स्थापना झाली, तर कंपन्यांसाठी कुशल मनुष्यबळ उपलब्ध होईल.प्रशांत कनोजिया, प्रमुख राज्य संघटक, महाराष्ट्र नवनिर्माण विद्यार्थी सेना
