सुरतमधील गरबा महोत्सवात युवराज राठोडने पोलीस उपनिरीक्षक असल्याची बतावणी करत व्हीआयपी प्रवेश मिळवला. दोन दिवस वॉकीटॉकीसह साध्या वेशात येत असताना आयोजकांना संशय आला. पोलिसांनी चौकशी करून त्याला अटक केली असून, त्याच्यावर गुन्हा दाखल करण्यात आला आहे.
अहमदाबाद: नवरात्रौत्सव काळात गुजरातमध्ये उत्साहाचं वातावरण असतं. अनेक भागांमध्ये रात्री उशिरापर्यंत गरब्याची धूम पाहायला मिळते. अनेक मोठ्या गरब्यांना पासशिवाय प्रवेश मिळत नाहीत. या पासची किंमतदेखील जास्त असते. त्यामुळे पास मिळवण्यासाठी अनेक जण विविध मार्गांनी फिल्डींग लावतात. काही जण वेगवेगळे जुगाड करतात. असाच जुगाड एका तरुणानं केला. सुरुवातीचे दोन दिवस त्याला गरब्यात प्रवेश मिळाला. पण नंतर त्याचं बिंग फुटलं. पोलिसांनी त्याला अटक केली.
सूरतच्या डुमस परिसरातील वायपीडी डोममध्ये गरब्याचं आयोजन करण्यात आलं आहे. या गरब्यात दोन दिवसांपासून युवराज नारु राठोड नावाचा तरुण येत होता. स्वत:ची ओळख त्यानं पोलीस सह निरीक्षक अशी सांगितली. साध्या वेशात तो गरब्याला यायचा. त्याच्या हातात वॉकीटॉकीदेखील असायचा. मंडपाच्या व्हिआयपी प्रवेशद्वारातून तो गरब्याला यायचा.मोठ्या ऐटीत गरब्याला येणाऱ्या युवराज राठोडचा व्हिडीओ समोर आला आहे. प्रवेशद्वाराजवळ असलेल्या बाऊन्सर्सच्या मधून तो अतिशय टेचात आतमध्ये जायचा. त्याला पाहून आयोजकांना शंका आली. त्यामुळे त्यांनी पोलिसांना माहिती दिली. पोलीस गरब्याच्या ठिकाणी पोहोचले. त्याची चौकशी केली. आपण पोलीस अधिकारी असल्याचं त्यानं सांगितलं. अनेक वरिष्ठ अधिकारी आणि राजकीय नेत्यांशी आपला परिचय असल्याचं त्यानं सांगितलं.
युवराजच्या मोबाईलमध्ये पोलीस दलातील बड्या अधिकाऱ्यांसोबत त्याचे फोटो होते. अनेक प्रसिद्ध व्यक्तींसोबतही त्याचे फोटो होते. पोलिसांनी युवराजची कसून चौकशी केली. युवराजचे वडील हिरे व्यापारी असून त्याच्याकडे असलेला वॉकीटॉकी हॉटेल चालवणाऱ्या मित्राकडून घेतल्याचं चौकशीतून उघड झालं.
पोलिसांच्या माहितीनुसार, युवराज राठोडची पद्धत अगदी फिल्मी होती. तो पोलिसांसारख्या मिशा, केशरचना ठेवून गरबास्थळी यायचा. तो गेल्या २ दिवसांपासून मंडपात येऊन व्हिआयपी भागापर्यंत यायचा आणि प्रसिद्ध व्यक्तींसोबत फोटो काढायचा.
आयोजक नयन मंगरोलिया यांच्या तक्रारीवरुन डुमस पोलिसांनी युवराज राठोडला अटक केली आहे. त्याच्या विरोधात गुन्हा नोंदवण्यात आला आहे. युवराजनं अशा प्रकारे किती कार्यक्रमांमध्ये प्रवेश केला, याचा तपास पोलीस करत आहेत.
